Ulteriur Grischun - La midada da l’ura ina giada tut auter...

Passa 15 onns è Armin Flütsch stà president da la plaiv da St. Antönien. Durant quai temp fascheva l’electricher dal vitg la midada fin che quel na pudeva in bel di betg pli raiver da las taissas e stretgas stgalas dal clutger siador. Uschia ha Armin Flütsch che posseda ina fatschenta da bajegiar accumpagnà l’electricher ina giada e surprendì il job da midar l’ura baselgia.

Sch'i tutga da memia u memia pauc na fa nagut

L’um da 56 onns habitescha e lavura a St. Antönien ed ha perquai adina puspè in egl sin l’ura baselgia. Sche l’ura da 103 onns na constat ina giada betg, p. ex. pervi da grondas differenzas da temperatura, va Armin Flütsch era tranteren spert sur mezdi ubain la saira suenter la lavur a drizzar l’ura. Sch’i tutga lura in pèr giadas da memia u memia pauc, quai na disturba tenor el betg ils da St. Antönien. Perquai na mida Armin Flütsch era betg l’ura da las duas sin las trais da la notg mabain da las 23:00 sin las 00:00.

Mecen american

L’emprima ura ha il clutger baselgia da St. Antönien gia survegnì l’onn 1677, var 200 onns suenter ch’ella è vegnida bajegiada. L’ura actuala è dapi la revisiun dal tetg l’onn 1913 vid il clutger, pajada dad in um ordiund dal vitg vaschin Ascharina ch’è dentant emmigrà en ils Stadis Unids.