«Igl è in cumbat, dentant jau na fatsch betg cun il cumbat, jau prend pacific», di ina dunna ch'emprova da manevrar il charret da cumpras tras la fulla da glieud. Igl è in dals ultims dis da la butia Globus a Cuira. Partiziun per partiziun sto vegnir svidada, perquai ha la butia organisà differents dis da rabat.
In sa strair per delicatessas
Sonda èn las delicatessas stadas vidlonder. Ed ord la butia nua che tut è normalmain in zic pli calm, è daventà in vaira basar. Gia avant che las portas èn s'avertas, spetgavan grondas fullas da glieud avant las trais entradas. Il manader da fatschenta Werner Ammann di, che tranter 1’000 e 2’000 persunas hajan nizzegià anc ina giada da cumprar lur vin, café ubain aschieu preferì. E propi, il pli tschertgà è stà il vin.
-
Bild 1 von 3Legenda: Las portas n’èn anc betg avertas, la glieud dentant gia pronta. RTR, S. Bundi -
Bild 2 von 3Legenda: Nagins charrets gia suenter paucas minutas ch’il Globus ha gì avert las portas. RTR, S. Bundi
-
Bild 3 von 3Legenda: Star en colonna davant la cassa, hai gì num per ina giada era en il Globus. RTR, S. Bundi
«Donn ch’il Globus serra»
Las bleras persunas deploreschan ch'il Globus banduna suenter varga 30 onns Cuira. Per delicatessas saja il Globus stà «la» butia. Senza il Globus as stoppia uss ir a Turitg per far cumpras pli spezialas. In um che spetga da pajar, guarda sin la fulla da glieud e scrola il chau, i saja «turpegius». «Sche tut quella glieud fiss er uschiglio magari vegnida en il Globus a far las cumpras, n'avess la butia forsa betg stuì serrar.»
Bainprest finì
Il termin definitiv per la serrada dal Globus è il 23. da schaner. Walter Ammann suppona dentant che la butia n’haja betg avunda rauba enfin lura. E perquai vala, «cura igl è finì, èsi finì».