Ulteriur Grischun - Il center da congress a Tavau en maun da «cosplayers»

Dapi 8 onns visita ella regularmain inscunters da cosplayers en Svizra sco er en la Germania ni en l'Austria. Vi dal cosplay fascinescha ella tant il giugar teater, sco er la preparaziun: zambregiar e cuser costums ed armas, modellar peruccas e sa smincar.

Sia fascinaziun per il Giapun ha Jasmin Schlegel gia da pli baud. Schon d'uffant tadlava ella gugent chanzuns giapunaisas perquai ch'il linguatg plascheva ad ella. Or da quest plaschair è pli tard sia passiun per il cosplay naschida. La giuvna da 26 onns studegia er Japanologia a l'universitad da Turitg.

«Japanimanga Night» a Tavau

En il Grischun è la scena da cosplay dentant plitost modesta. Jasmin Schlegel enconuscha be duas collegas ch'èn era fans da cosplay. Quai pudess dentant sa midar suenter quella fin d'emna. Per l'emprima giada ha la «Japanimanga Night», in inscunter da fans da manga or da l'entira Svizra, lieu si Tavau. Enfin uss è ella stada a Winterthur, là na tanscheva il plaz dentant betg pli. Ils organisaturs quintan cun 6000 visitaders.

Origami, sake ed animes

Sper differents cosplayers renumads e da hobi, porscha la «Japanimanga Night» er workshops: per exempel da faudar origami, da gieus tradiziunals giapunais, degustaziuns da sake, referats sur da la cultura giapunaisa, films d'animaziun e concerts.