En in'emprima etappa vegnan reunidas 400 plazzas da lavur en in nov edifizi a Cuira vest. L'intent dal nov edifizi è quel da trair a niz il meglier pussaivel sinergias, d'optimar andaments, d'augmentar la flexibilitad da l'utilisaziun dals locals sco er da reducir il basegn general da surfatscha. Quai communitgescha la regenza grischuna.
Tut en tut 14 differentas unitads d'organisaziun (dus departaments e 12 posts da servetsch) vegnan a sa chasar en il nov edifizi administrativ «sinergia». Las plazzas da lavur vegnan realisadas per gronda part cun structuras spazialas avertas tenor las enconuschientschas las pli novas areguard l'acustica, areguard l'utilisaziun dal cler dal di ed areguard l'organisaziun da la lavur. Cumplettadas vegnan quellas cun zonas d'inscunter, cun locals centrals e cun zonas da servetsch.
Strategia d'immobiglias chantunala
La realisaziun dal center administrativ «sinergia» a Cuira fa part da la strategia chantunala d'immobiglias. Quella prevesa d'installar totalmain nov centers regiunals ferms ch'èn repartids en tut il chantun.
Realisaziun en etappas
Il concept da realisaziun «sinergia», ch'è planisà per il lieu d'administraziun Cuira, prevesa da spustar tut en tut 670 plazzas da lavur a Cuira vest e duai vegnir realisà en duas etappas separadas. En l'emprima etappa da realisaziun duain las unitads d'organisaziun che han il pli grond basegn d'agir, vegnir dischlocadas en il nov edifizi administrativ a la Ringstrasse / Salvatorenstrasse cun var 400 plazzas da lavur. En ina segunda etappa, che sto puspè vegnir suttamessa al parlament ed al pievel avant ch'ella po vegnir realisada, duain vegnir endrizzadas 270 ulteriuras plazzas da lavur.
Il project «sinergia» na prevesa ni d'augmentar il dumber total da collavuraturas e collavuraturs da l'administraziun chantunala ni da dischlocar plazzas da lavur dals ulteriurs centers regiunals en la chapitala chantunala.
RR novitads 12:00