Ils onns otganta e novanta ha Cecilia Demarmels exponì bler - tranter 20 e 30 exposiziuns. Quai surtut a Friburg, nua che la dunna oriunda da Salouf ha vivì dapi l'onn 1982. Quai tut sper sia lavur sco dissegnadra scientifica tar l'Uffizi d'archeologia chantunal. Da quel temp n'ha ella betg mo exponì bler, mabain era retschavì in premi da promoziun sco era stipendis d'art da renum. Uschia per exempel in stipendi per il «Atelier Jean Tinguely» a Paris u in stipendi per il «Atelier Schönhauser Allee» a Berlin.
Las gronds midadas
L'onn 2007 dentant la gronda midada. Pervia da l'amur mida ella da Friburg a Lucerna. Ella n'ha betg be laschà enavos sia vita a Friburg, mabain era ses art. Ella saja da quel temp crudà en ina via tschorva cun ses art. Uschia ha ella mess tut sia creativitad en sia nova lavur en in museum istoric.
L'onn 2015 ha in accident da skis dentant anc ina giada midà tut. Pervia dal lung temp per curar la fractura da la batschida n'ha Cecilia Demarmels betg pudì lavurar e cura ch'ella saja puspè stada pronta, hajan els desditg ad ella la plazza.
Uschia ha ella puspè gì temp e motivaziun per far art. La motivaziun saja surtut vegnida, perquai ch'ella ha emprendì d' enconuscher in designer, che ha gia lavurà per Yves Saint Laurent e Givenchy. El haja mussà ad ella ina nova tecnica per far maletgs ed uschia puspè inspirà ella.
Uss viva Cecilia Demarmels sulettamain da l'art e quai cun tutta olma. Venderdi ils 18 da schaner ha ella gì la vernissascha da sia exposiziun en la gallaria J.-J. Hofstetter a Friburg, che ha lieu fin ils 16 da favrer. Ed en futur vul ella era puspè returnar en sia patria ed exponer dapli en il Grischun.
Telesguard 17:40