A chaschun da la preschentaziun da quest studi ha l'Allianza da turissem dal Grischun accentuà ch'i dovria in pachet da mesiras per far frunt a la mancanza da persunal.
Marc Tischhauser, manader da Gastrogrischun, descriva ils basegns uschia: I giaja per ina cumbinaziun da models da lavur individuals cun bunas cundiziuns da lavur, structuras e teams che stiman il persunal, ina buna reputaziun da la branscha da turissem e spazi d'abitar pajabel. L'allianza da patrunas e patruns veglia surpigliar la coordinaziun da quellas mesiras.
![Marc Tischhauser, Anke Gähme, Frieder Voll.](https://www.rtr.ch/static/cms/images/960w/f39ad6.jpg)
Davart models da lavurar individuals dovria schliaziuns individualas dals manaschis da turissem. Per mintga manaschi dettia qua autras pussaivladads. Davart las cundiziuns da lavur ed il clima da lavur, dettia gia mesiras davart l'allianza, per exempel davart furmaziun da persunal.
Per porscher spazi d'abitar pajabel dovria ina «collavuraziun colleghiala» tranter maun public ed ils manaschis.
Basegns da tuttas partenarias
En in studi ha la Scol'auta grischuna retschertgà davart ils basegns da patrunas e patruns ed emploiadas ed emploiads. Sin basa da quella retschertga ha la Scol'auta proponì mesiras che pertutgan blers secturs.
Uschia dettia mesiras davart cuntentientscha dal persunal, davart las circumstanzas generalas, la promoziun da giuven persunal e da l'attractivitad da la branscha.
Trais da las mesiras da l'allianza da turissem ha Tischhauser descrit en la communicaziun. Persunas che lavuran en il turissem duain pudair profitar da cussegliaziun, purschidas supplementaras d'abitar e temp liber. El numna er curs per manaders e manadras per in bun clima da team. Plinavant dettia ina rait da sa barattar per persunas giuvnas ed ambiziunadas en la branscha.
Tenor in studi da la BSS SA ha il Grischun il pli grond basegn da persunal qualifitgà en Svizra da tut ils chantuns. Fin l'onn 2040 vegnian a mancar 32'000 emploiadas ed emploiads qualifitgads.