La notg sin dumengia sajan vegnids arrestads quatter umens a Trimmis, scriva la Polizia chantunala. Ils quatter burgais tircs charravan la sonda saira tard sin l’A13. La Polizia chantunala e la Polizia da la citad da Cuira hajan fermà l’auto e controllà ils umens.
A la controllà è sa mussà, che dus dals umens, da 37 e 38 onns, levan far passar ils auters dus clandestinamain en in pajais vischinant. Lezs dus, umens da 26 e 27 onns, n’avevan dentant nagin visum per la Svizra.
Ulteriuras examinaziuns han collavuraturs da l’Uffizi federal da la duana e da la segirezza dals cunfins sustegnì. Tut ils pertutgads vegnan visads da la Svizra. Ils dus traffitgants d’umans supponids na dastgian per dus onns betg pli entrar en Svizra. Ultra da quai sajan els vegnids denunziads.