A Berna s’engascha Martin Candinas fitg per il rumantsch. Sia partida chantunala l’AdC ha bain repartì en las valladas talianas ina broschura en talian, ina versiun rumantscha na datti dentant betg. En las regiuns rumantschas è vegnì scumpartì ina broschura senza in sulet pled rumantsch u talian. «Er sche la partida ha per las elecziuns spezialmain ina pagina d’internet en tut las trais linguas chantunalas è la cumparsa da la broschura ord mia vista penibla», uschia noss redactur Toni Poltera.
Nagin rumantsch sin las paginas d'internet
Er la PLD e la PPS na persvadan betg noss redactur puncto trilinguitad. Bain èn en la broschura da la PLD da chattar slogans ed infurmaziuns sco eleger en rumantsch, sin las paginas d’internet da las dus partidas n'èn il rumantsch ed il talian betg pli preschents. «Fertant che la PPS ha ina scrittira tuttina gronda per tut las trais linguas, sa differenziescha tar la PLD la grondezza dal talian e rumantsch vers il tudestg, e sin la broschura è il rumantsch schizunt betg grass», uschia Poltera.
La PS na fa betg questa differenza. «L’emprima pagina cun ils slogans sco er l’ultima pagina da la broschura è la scrittira medema», resumescha il redactur dad RTR. Il medem vala per la cumparsa sin la pagina d’internet da la partida chantunala. Consequentamain triling e cun tuttina gronda scrittira è er cumparida la broschura da l’UDF. La pagina d’internet è dentant mo en tudestg.
La Verda e la PVL ènsumegliantas quai che pertutga la preschientscha da las linguas sin las broschuras. Nagina differenza da scrittira e cuntegn tar las dus partidas. En egl è dà a noss redactur che la broschura dals verd-liberals cuntegn ils pli blers codes-QR, «e quels sin la pagina rumantscha da la broschura na mainan betg directamain sin ina pagina electronica rumantscha. Quella na datti insumma betg», uschia declera Toni Poltera, ch’ha cumpareglià tut las partidas grischuna en il cumbat electoral naziunal.