La famiglia da ses um viva ad Istanbul, ed è pia betg pertutgada dal grond terratrembel als cunfins tar la Siria. Ils amis da ses um vivan dentant en la chapitala da la regiun pertutgada. Dad els auda ella da la catastrofa. Las quatter la damaun haja la terra cumenzà a tremblar. Suenter hajan els immediat cumenzà a gidar la glieud en il conturn. Il cusrin da ses um, che maina ina fatschenta, haja transportà rauba gratuitamain en il territori da catastrofa.
Ella è oriunda da Mustér en Surselva e viva cun ses um e la figlia en il chantun Turitg. Ses um è da la Tirchia, dad Istanbul.
Tut las plazzas aviaticas èn destruidas ed ins na po betg charrar sin las vias. Jau hai vis ina fotografia da rodaglias ch'èn sturschidas sco in dad otg. Quella forza na pon ins betg s'imaginar.
Surtut medicaments e rauba dal mintgadi sco resti chaud d'enviern, cuvertas e chalzers sajan necessaris. Era la societad aviatica da la Tirchia emprovia da sgular en la regiun cun medicaments e medis.
Agid davent da la Svizra
Era davent da la Svizra haja in collega da ses um organisà agid per las unfrendas dal terratrembel. A Turitg hajan ins surtut rimnà resti d'enviern, chalzers e cuvertas. Mesemna e gievgia sajan mintgamai in aviun da cargo partì da Turitg en la regiun pertutgada.
Betg dar si la speranza
En il lieu tschertgian ils gidanters vinavant persunas ch'han survivì sut las ruinas, ed er quatter dis suenter il terratrembel chattian ins anc survivents. Nagin dettia si la speranza, tuts tegnian ensemen ed ins resentia ina gronda solidaritad da dapertut.
