Malgrà las difficultads ed ils travaschs dals ultims mais sa legra Maike Lex sin sia nova incumbensa ed sin il team. En qual sa chattan novas fatschas, sco er collavuraturas e collavuraturs da blers onns.
Jau guard enavant cun in cor lev.
En il mund da teater ha Lex gia ina tscherta experientscha, saja quai sco reschissura libra u sco manadra da teater a Berna. Ina sfida per la direcziun dal teater Cuira vesa Maike Lex en l'aspect finanzial.
Cultura dovra raps.
Per pudair remunerar las collavuraturas ed ils collavuraturs confurm al temp e per pudair realisar producziuns dal Grischun, vegnan duvrads meds finanzials.
Il teater da Cuira vegn a tschertgar il discurs cun la citad ed il chantun per survegnir eventualmain dapli sustegn finanzial.
Maike Lex lavura per l'emprima giada per il teater a Cuira e na veglia betg metter l'entir manaschi sin il chau.
Jau ma ves sco dumandadra e partenaria da dialog.
Il program da teater da la proxima stagiun vegn ad esser varià e multifar. I vegn a dar tocs dals geners act, opera, teater da saut e classichers da Shakespeare u Goldoni. Ultra da quai vegni a dar in project da la gruppa da Sara Calörtscher ed ovras da Leta Semadeni.