Il project per quest binari che vegn duvrà per chargiar enturn rauba e deponer chars è il mument en la fasa nua ch’ils responsabels da la Matterhorn-Gottard (MGB) laschan examinar il chantun sche in tal binari mort pudess vegnir approvà, uschia ha il president communal René Epp infurmà il parlament communal. La vischnanca da Mustér è tenor indicaziuns dal president gia vegnida activa ed ha scrit a la direcziun da la viafier che la vischnanca na possia betg star davos quai plan ed ella pretendia che ulteriurs lieus vegnian examinads.
Nus avain avant paucs dis survegnì ina curta resposta da la MGB ch’els veglian era sclerir las propostas da la vischnanca da realisar il binari mort en in auter lieu.
Betg simpel da chattar ina soluziun ideala per la MGB
Perquai che la staziun da Sedrun ha da vegnir sanada ils proxims onns, per ademplir la lescha da persunas cun impediments, ma era per renovar l’entira staziun, vegn in binari mort stritgà. Quel è dentant necessari per il manaschi, uschia è vegnì orientà. Per realisar in tal binari dovri pliras premissas. Uschia na dastga quel betg esser en il traject cun rodas dentadas ed el sto ademplir ina lunghezza da 160 meters en ina lingia pli u main grada. Las premissas sut il vitg da Segnas èn perquai tenor la viafier idealas e tranter Dieni e Mustér para la suletta schliaziun. Gest quai dubitan las parlamentarias ed ils parlamentaris e pretendan cun la resoluziun inoltrada d'immediatamain terminar ils plans. L’argument principal è ch’il maletg dal vitg vegnia disturbà e terren agricol giaja a perder.
Gia pli baud avain nus stuì unfrir terren agricol per la construcziun da la staziun e dals binaris, uss na vulain nus betg dar quest terren.
La suprastanza spetga uss sin la posiziun detagliada da la MGB. Quella saja vegnida empermessa sin ils 10 da schaner 2025, il di da la saramentaziun dal nov parlament communal, declera René Epp.
Zona da mastergn Pignola duai vegnir surbajegiada
Dasper la realisaziun dal binari mort, en il vest da la zona da mastergn Pignola èn anc plirs projects planisads sut il vischinadi da Segnas. Uschia duai la part gia enzonada vegnir surbajegiada il proxim temp tras in bajetg da l’interpresa Berther Bau. Suenter quai pudess alura la proxima etappa da la zona da mastergn vegnir averta, quai sch’il chantun approvescha la dumonda, di René Epp. La finamira saja da realisar la zona per las interpresas indigenas. Dentant di il president communal ch’els vegnian a tegnair in egl sin il project actual, ma surtut era sin l’entir svilup e gist perquai saja la realisaziun d’in binari mort in svilup sbaglià en quest lieu.
