La regenza ha approvà la planisaziun locala che la vischnanca da Breil aveva gia concludì il settember 2020. Cun la nova via saja garantì ina colliaziun segira durant l'entir onn tranter las fracziuns da Breil Vitg, Vuorz ed Andiast, scriva la regenza grischuna.
La via da colliaziun è ina part integrala dal contract da fusiun tranter las trais vischnancas Breil, Andiast e Vuorz. La via duai surtut pussibilitar ina pli stretga convivenza tranter la populaziun da las anteriuras vischnancas. Plinavant ha la via da garantir il transport da las scolaras ed ils scolars durant l'enviern. Envers la decisun da la regenza èsi pussaivel da far recurs entaifer ils proxims 30 dis a la Dretgira administrativa, aschia la vischnanca da Breil envers RTR.
Ditg stà in tema da dispita
Tant il WWF Svizra sco er la Fundaziun svizra per la protecziun da la cuntrada avevan fatg recurs cunter la via da colliaziun che maina tras il territori da Migliè. La via asfaltada saja inutila e destrueschia in territori da recreaziun, avevan las duas organisaziun argumentà.
Dentant era en connex cun la fusiun da las vischnancas ha il project per questa via spartì ils mainis – surtut a Vuorz. Ils ins avevan tema da dapli traffic, auters beneventavan ina colliaziun che serva era a la scola ed al turissem. L'onn 2017 han las trais vischnancas decis da fusiunar ed han cunquai era acceptà la via da colliaziun.
Ord l'Archiv
L'atun 2019 ha RTR preschentà ils plans per la via da colliaziun tranter Breil e Vuorz.