Il plaschair era grond cura che la societad cooperativa Pro Stizun Val Medel ha reavert la stizun dal tut renovada a Curaglia, il cumenzament da la stad passada. Uschia era suenter l’annunzia da serrar la stizun, il november 2022, sa furmada in moviment, cun il resultat che la societad cooperativa Pro Stizun ha uss radund 200 commembras e commembers. Quella basa finanziala e quai sustegn saja probabel la clav da success per pudair agir era en l’avegnir, di il president da la societad cooperativa, Gabriel Venzin. Strusch avert la stizun cun duas persunas engaschadas dal fatg, han quellas visà la plazza, durant il temp d’emprova. Uschia ha la suprastanza gì da tschertgar ina nova soluziun. Quai na saja betg stà simpel, ma la finala hajan els gist prendì la chaschun e midà la strategia.
Novas persunas or da la Val Medel
Il mument èn tschintg persunas engaschadas en la stizun ed il café. Quai tut persunas che vivan en la Val Medel. Quai è la premissa da sviluppar betg sulet la stizun, mabain era da sa posiziunar sco lieu da sentupada ideal. Gia da l’entschatta saja stà la finamira dad era porscher – dasper la pussaivladad da cumprar las chaussas dal mintgadi – in lieu nua ch’ins po s’inscuntrar e dar ina baterlada, di Gabriel Venzin.
La svieuta constat – ma igl ha anc potenzial
Era las cifras constattan il mument, di Werner Venzin, il responsabel per las finanzas en la societad. La finamira na saja betg da far gudogn, ma che la stizun vegnia da purtar sasezza e quai saja il mument il cas. Ma senza che la glieud vegnia a cumprar en la stizun n’haja quella betg in futur. Il sulet sustegn ch’ins possia far, saja da vegnir a cumprar, di l’um che viva dapi sia pensiun puspè en vischnanca. Era in avantatg saja che la vischnanca da Medel sustegnia fitg il project e pretendia ils proxims onns nagin tschains per las localitads, di Werner Venzin, che sesa era en la suprastanza communala. La lavur ch’el fetschia per la societad cooperativa saja dal tut voluntara, dentant era lavur ch’el fetschia cun persvasiun.
