Sonda, ils 3 d’avust, datti gieus da ballape sin la plazza Isla. Tranter auter gioga era l’equipa US Rueun 2006, ins po pia guardar intginas legendas en acziun. In dals puncts culminants è il gieu tranter l’equipa actuala – l'US Rueun 2024 – cunter l'US Rueun 2006. Sin visita èn er il CB Laax ed il FC Turgi che dattan ballape durant il suentermezdi. Vers la saira datti ina tschaina, la rangaziun dal turnier, in pled festiv e suenter musica e festa. Musica fa il Don Gamboni Trio, a quel che Pascal Gamboni, Valeria Zangger e Rees Coray fan part.
-
Bild 1 von 4Legenda: Il turnier durant la festa a Rueun attira la glieud. RTR -
Bild 2 von 4Legenda: Il punct culminant era il gieu tranter la squadra actuala da la US Rueun e la anteriura squadra dal 2006. RTR
-
Bild 3 von 4Legenda: La squadra activa ha gudagnà 2:1 entcunter la squadra dal 2006. RTR
-
Bild 4 von 4Legenda: La plazza da ballape Isla. RTR
L’istorgia da l'US Rueun
Il 1948 è l’uniun sportiva vegnida fundada. 16 onns pli tard – a partir dal 1964 – ha l'US Rueun alura giugà lur emprim gieu en il campiunadi regiunal. In dals fundaturs dal club da ballape era Ciril Dermond, da lez temp saja el stà in giuvenot che era in fanaticher da ballape. Da quel temp n'avevan els anc nagina plazza da ballape ed han uschia giugà la gronda part dals gieus a Schluein, a Trun, Tavanasa u a Glion. Ciril Dermond sa regorda, ch'els èn ids cun velo als gieus. In da la squadra aveva in motorin da Rapid cun ina surfatscha da chargiar davosvart, là è la squadra sesida si ed ida als gieus. Il 1966 è la plazza da ballape ad Isla alura vegnida construida. L'US Rueun ha giugà en quarta liga, quai era da lez temp la pli bassa. Per intgins onns han els era giugà en la terza liga.
-
Bild 1 von 3Legenda: L'emprima equipa da l'US Rueun il 1964. MAD
-
Bild 2 von 3Legenda: Ciril Dermond è in dals fundaturs dal club da ballape Rueun. El ha giugà per l'US Rueun a partir da l'entschatta. RTR
-
Bild 3 von 3Legenda: Mirco Dermond, il chapitani da la squadra activa. RTR
Quest onn vegn celebrà il giubileum da 60 onns. Sch’ins guarda dentant precis, alura mancan tranteren 10 onns en il campiunadi. Il 1996 ha l'US Rueun gì memia paucs giugaders ed ha stui sa retrair dal campiunadi. Pir 10 onns pli tard – il 2006 – è alura ina nova squadra sa messa ensemen. In dals iniziants era Claudio Brenn. El ed intgins collegas giugavan en autras squadras en Surselva. Cun gronda lavur ed engaschi han els puspe bajegia si ina squadra activa. Dapi lura giogan els per la gronda part en la tschintgavla liga, actualmain la pli bassa. Ina stagiun ha la squadra da l'US Rueun dentant era dà en la quarta liga. Actualmain han els 26 giugaders activs. Per il chapitani actual, Mirco Dermond fissi in'ambiziun da giugar en quarta liga. Dentant plaschi ad el er en tschintgavla liga – impurtant saja la squadra. E questa sa senta per el sco ina famiglia.