L’ovra solara Scharinas ha la lubientscha da construcziun sco era la lubientscha per las lingias electricas da colliaziun. Quai saja l’emprima lubientscha cumpletta per ina ovra solara gronda, scriva l’Energia Alpina en la communicaziun a las medias. Sco proxim vegn tschertgà in partenari strategic per pudair realisar il project che vegn a custar radund 80 milliuns francs, uschia ils responsabels. Era vegnia il project surlavurà successivamain, surtut ils elements da montascha vegnian sviluppads vinavant, perquai che las maisas da montascha sco era l’entir encablament fetschian ora circa 80% dals custs, sco quai che l’Energia Alpina ha communitgà a l’ultima radunanza da vischnanca da Tujetsch.
Tabla da temp è uss concreta
Ils proxims 30 dis vegn quai anc ad esser pussaivel da far recurs cunter la lubientscha, suenter entra quella en vigur. La vischnanca da Tujetsch vegn alura era anc ad adattar il contract da dretg da construcziun e laschar approvar las midadas a la proxima radunanza communala dals 26 da zercladur. Alura èsi planisà da cumenzar cun la via d’access Milez-Cuolm Val e da cumenzar cun l’emprima etappa da construcziun la stad, il pli tard l’atun da quest onn. Ils emprims 10% da l’ovra han da vegnir vid la rait fin l'onn 2025, l’entira ovra è planisada d’esser a fin sin l’atun 2028.
Daco in partenari strategic?
Sco emprim vegn fundà ina societad d’acziuns cun il num «Sedrun Solar». La maioritad da questa societad vegn l’Energia Alpina a salvar. Ma tuttina dovri in ferm partenari strategic perquai ch’ils custs da 80-85 milliuns francs na po l’Energia Alpina betg purtar persula. Era portia in partenari strategic savida ed experientscha tar in tal project, uschia han ils responsabels infurmà las convischinas ed ils convischins da Tujetsch. Era impurtant saja da vegnir da vender l’energia ed era qua possia in ferm partenari purtar avantatgs, uschia Claudio Deplazes president dal cussegl d’administraziun a l’ultima radunanza da vischnanca.
Nagins recurs l'onn passà
Il temp per far recurs cunter il project a Scharinas era scadì senza in tal. Ma era senza ch’insumma insatgi aveva prendì invista en ils documents.
