L’ovra da Matias Spescha dals ultims onns da sia vita n'è quasi anc betg stada da vesair en Svizra. Il giavisch da pudair exponer ella era dentant surtut tar l’artist mort il 2008 grond. Ed uss saja quest giavisch ì en vigur, di sia figlia Venice Spescha. Ella ha regalà a la fundaziun Ogna l’ovra da ses bab, in'ovra che cumpiglia quasi 1’000 maletgs, ch’en era betg tuts da vesair en il nov Spazi Spescha, pertge il plaz è era cun quasi milli meters quadrat limità. In motiv è che las ovras da Matias Spescha èn plitost grondas. Quai saja era la raschun ch’ins haja stuì tschertgar localitads idealas e quellas han ins chattà en l’anteriura fabrica a Trun, là nua che la vita professiunala da Matias Spescha ha cumenzà, cun ses emprendissadi da cusunz.
Grond resun a la vernissascha
Radund 100 persunas èn stadas presentas a la vernissascha en las localitads novas. Glieud saja vegnida da l’entira Svizra e dal exteriur, di Lisa Schmidt-Candinas ina da las iniziantas da Trun Cultura. Quai mussia la reputaziun da Matias Spescha en il mund d’art naziunal ed internaziunal. Ma era persunas da Trun èn stadas preschentas a l’avertura da l’exposiziun. Uschia ch’ins po propi dir che quella è gartegiada.
Per Trun Cultura cumenza la lavur
L’uniun Trun Cultura è uschia vegnida da realisar in emprim pass, di il president da l’uniun Armin Niederberger. Ma la lavur cumenzia quasi uss, pertge d’ina vart sto il Spazi Spescha chattar ses plaz en il mund d’art, da l’autra vart è il project Casa Carigiet sin buna via da vegnir realisà. Là vegnian uss fatgas lavurs da rumida dapi in temp e tut quels che passian il bajetg vesian ch’i va insatge. L’atun saja alura planisà d’allontanar il palancà e sin il giubileum da 600 onns Ligia Grischa veglian els esser pronts cun tut, di Armin Niederberger.
