Il chantun Grischun è in vast chantun – betg sulet da la grondezza ma era da la diversitad economica. Uschia datti vischnancas grondas ch'han in svilup economic bun e promovan er gist cun in sviluppader communal l’economia. Ma autras regiuns dovran impuls e pon profitar da l’infrastructura da la regiun che finanziescha communabel cun il chantun ils sviluppaders regiunals. In recept na datti betg, uschia èsi sulet impurtant d’insumma esser curaschus e vulair promover il svilup, e qua na saja betg impurtant sin tge livel, communal, regiunal u chantunal, di Peder Plaz dal forum d’economia Grischun.
Quant svilup fa da basegn
La dumonda centrala saja adina quant svilup ch'ina regiun basegna. En regiuns periferas, influenzadas dal turissem, saja in svilup da projects adina giavischà. Era sch'il input vegnia dad ordvart saja da beneventar, n'emporta betg tgi che vegnia cun quai impuls, uschia Peder Plaz. Ma il sviluppader regiunal stoppia esser ina persuna che veglia sviluppar vinavant projects, ma er ina che vesia il potenzial da projects, il meglier anc integrà en la regiun e collià cun quella. Quai sajan profils che na vegnian betg simplamain uschia, quellas persunas stoppian ins er ir a tschertgar per lura avair success. Ma vis sur tut ora saja pli impurtant ch'i dettia insumma in process da svilup, n’emporta betg danunder.