Las lavurs vi da l’areal da la staziun a Glion han cumenzà avant in onn. Planisà è da realisar in grond bajetg nov cun spazi d’abitar e da commerzi, sco era localitads per il Center da furmaziun Surselva. En ina emprima fasa han ins uss realisà la plazza d’autos da posta nova confurm als basegns per persunas cun impediments, là nua ch’ils parcadis eran fin qua. Ils autos da posta vegnan a far midada en il nov lieu ils 11 da november, uschia ha il president communal Marcus Beer infurmà. Era èn vegnidas realisadas novas pussaivladads da parcar l’auto «parc+ride». Ils 51 parcadis per autos, 34 per velos e 4 per motos vegnan averts sin la fin da l’onn, uschia ha la vischnanca da Glion infurmà a chaschun d'ina pitschna festa d’avertura. Realisads èn ils parcadis vegnids da l’autra vart da la staziun cunter il Rain.
-
Bild 1 von 3Legenda: Ils novs parcadis dals autos da posta han ina nova illuminaziun e porschan plaz a las passagieras ed als passagiers. RTR -
Bild 2 von 3Legenda: Ils novs parcadis d'autos da posta èn tuts vegnids realisads confurm a la lescha da persunas cun impediments. RTR
-
Bild 3 von 3Legenda: Ils parcadis actuals avant il center Marcau. A partir dals 11 da november fan ils autos da posta midada sin il nov areal. RTR
Bajetg vegl svanescha
La gronda midada vegn ad esser ch’il bajetg da la staziun vegn dismess. Quellas lavurs duajan cumenzar cun l’entschatta da l’onn 2025. Era vegn il segund sutpassadi construì a fin a partir dal schaner 2025. Il mars cumenzan lura las lavurs da stgavament per il nov edifizi da la staziun. Finidas duajan las lavurs esser l’atun 2027, scriva la vischnanca da Glion.
Il spurtegl provisoric vegn dasper l’hotel Eden
Per las passagieras ed ils passagiers dal traffic public sa midan las proximas emnas pliras chaussas. Uschia è il spurtegl da chattar a partir dal december en in provisori avant l’hotel Eden. Era vegnan pliras vias a sa midar sin la plazza d’autos da posta, scriva la vischnanca. Ella è ensemen cun la VR Immobiglias SA la patruna dal project. Uschia è la vischnanca responsabla per la nova plazza d’autos da posta ed il parc+ride. Il bajetg nov vegn realisà da l’interpresa VR Immobiglias SA. Quella societad è en possess da la Viafier Retica, ed è responsabla per il svilup sin ils areals da las staziuns da la viafier. Tranter auter realisescha ella projects a Puntraschigna e Scuol.
Las investiziuns totalas a Glion muntan a 40 milliuns francs. Sco la vischnanca da Glion scriva, surpiglia la VR Immobiglias SA dapli che 30 milliuns da quests custs.