![Fotografia da la stretga via tras il vitg da Vuorz.](https://www.rtr.ch/static/cms/images/960w/49ea6b.jpg)
La fusiun da Breil, Vuorz ed Andiast va en la fasa finala: La votaziun è ils 24 e 25 da zercladur. Suenter il na da l’onn 2012 vegn votà per la segunda giada per ni encunter la fusiun da quellas trais vischnancas.
Ils adversaris da la fusiun èn restads ils medems sco la davosa giada; ed in dals arguments ils pli impurtants encunter la fusiun è anc adina la via da colliaziun tranter Breil e Vuorz, la via tras la val Migliè.
Sonda ils 3 da zercladur datti in til che maina davent da Vuorz encunter Breil, in til organisà dals adversaris da la fusiun.
WWF e Pro Natura era da la partida
![La val Miglié sa chatta tranter Breil e Vuorz.](https://www.rtr.ch/static/cms/images/960w/6f3840.jpg)
Spezial è dentant, che WWF e Pro Natura èn sin il placat sco cunorganisaturs dal til. Per Renata Fulcri, che tgira quest project per la Pro Natura, n’è quai betg in agir spezial da vart da la Pro Natura. Il contract da fusiun prevesia numnadamain ina via tras la val Migliè e quella via saja per la Pro Natura e per il WWF dispitaivla.
Sievi Sgier, il president da la vischnanca d’Andiast e pledader da medias dals aderents da la fusiun, deplorescha che WWF è Pro Natura s’engaschian encunter la fusiun en quella fasa curt avant la votaziun.
Il til da protest è, sco ils organisaturs scrivan, averts per tuts. Era persunas che beneventan la fusiun sajan bainvesidas al til.
RR actualitad 08:10