Durant la davosa radunanza communala a Val è vegnì surdà per mauns da la suprastanza communala ina iniziativa che pretenda, che la vischnanca incassia immediat ils 6 milliuns francs ch'ella ha anc dabun da la Priora Projekt SA da Remo Stoffel. Quels 6 milliuns francs èn ina part dal pretsch da cumpra da radund 10 milliuns francs, che la vischnanca da Val aveva fixà cun la Priora Projekt SA per l’hotel ed il bogn termal igl onn 2012.
Emprest da 6 milliuns francs
Per quels 6 milliuns ha la vischnanca concedì a la Priora Projekt SA in emprest senza tschains enfin la fin mars 2015. La cundiziun era, ch'i vegnia elavurà fin lura in project per ina halla polivalenta a Val.
Sch'i avess dà in tal project e la populaziun avess acceptà el, avess la Priora Projekt SA stuì investir quels 6 milliuns francs plus anc ina giada 6 milliuns francs ord l'agen satg. El cas ch'i na dettia betg ina halla polivalenta fin la fin mars 2015, avess la Priora Projekt AG stuì pajar enavos ils 6 milliuns francs a la vischnanca.
Decisiun betg valaivla
Tenor Marcel Rieder, in dals iniziants, haja il cussegl da vischnanca dentant decidì a l'entschatta da l’onn, che la Priora Projekt AG na stoppia betg pajar ils 6 milliuns francs la fin mars. Ina decisiun ch’il cussegl da vischnanca n’avess betg dastgà prender.
Pajar entaifer 4 emnas
L'iniziativa vul cuntanscher, che la proxima radunanza communala decidi da pretender enavos ils 6 milliuns francs da la Priora Projekt AG entaifer 4 emnas. E quai cun in tschains da retard da 5% quintà davent dals 1 d'avrigl.
Il president communal da Val Stefan Schmid na ha betg vulì prender posiziun. El quinta che la proxima radunanza communala pudess avair lieu il pli baud vers la fin schaner 2016.
RR novitads 06:00