Il cussegl ha dentant acceptà la cuntraproposta da la suprastanza communala (cun 7:4) che vul cuntinuar la via da la collavuraziun tranter las vischnancas en la Cadi. La discussiun durant la radunanza è stada animada.
Fusiun forsa en 20-30 onns
Ils adversaris da l’iniziativa han fatg valair, ch’il pievel da Tujetsch duai pudair decider. Prioritad haja la collavuraziun tranter las vischnancas en la Cadi e betg ina fusiun. Era il president communal Beat Roeschlin ha manegià che quai saja la dretga via – e quella funcziuneschia. Ina fusiun pudess esser ina finamira a lunga vista, en 20-30 onns. Plinavant han ils adversaris ditg ch’ina fusiun fiss oz la fallida via («schliaziun cun il martè»); la vischnanca da Tujetsch saja pli ferma, sch’ella restia ina vischnanca autonoma.
Tschertgar communablamain schliaziuns
René Epp, in dals iniziants da l’iniziativa «Contractivas da fusiun en la Cadi», ha fatg attent ch’ins na fusiuneschia betg. I saja da contractar e da discutar, tge schliaziuns ch’i dettia. Intgins cussegliers han sustegnì el schend ch’ins stoppia respectar las opiniuns differentas. I fiss bun dad esser avert per las discussiuns e da tschertgar communablamain schliaziuns. Il giuven en il cussegl da vischnanca da Tujetsch ha concludì ch’ins stuessi patratgar vid l’avegnir e vid la giuventetgna. Uss sto il pievel da Tujetsch decider davart questa iniziativa – e quai a chaschun dad ina radunanza communala.
Gea a dus credits
Plinavant ha il cussegl da vischnanca da Tujetsch approvà il credit da planisaziun da 370’000 francs per sanar ed engrondir il Bogn Sedrun. E gea ha il cussegl era ditg al credit da 1,44 milliuns francs per il nov bajetg dals fatgs da vias. Questa fatschenta vegn anc davant la radunanza communala.
RR actualitad 07:00