Els discurran gia bain tudestg. Ils trais giuvenils manegian dentant ch’els sappian meglier englais che tudestg. Tudestg saja numnadamain grev. Per ex. n’haja il linguatg chinais nagins artitgels. Difficil saja quai era d’emprender ils casus da nominativ fin accusativ.
Chattà blers amis
Mintgatant van els era a cumprar victualias en las stizuns da Mustér. Zhang ha constatà che la tschigulatta svizra è memia dultscha per ella. Bai ha gugent Rivella e Ze café da glatsch e jogurt. Els han gia chattà blers amis ed i plascha ad els en il gimnasi da Mustér. Mintgatant vegnan ils parents a far ina visita.
Pretendì nivel B1
A l’entschatta cura ch’els èn vegnids, han els stuì far in curs da tudestg. Tudestg ston els era savair per pudair suandar l’instrucziun. I vegn pretendì ch’els cuntanschian il nivel B1, in nivel pretensius. «Ils scolars chinais han gia cuntanschì quel en plirs puncts», di il rectur dal gimnasi da Mustér, Bruno Hensler.
La finamira saja d’integrar ils scolars esters. Impurtant saja era il contact cun ils geniturs. Gia a l’entschatta han scolasts (menturs) e scolars (padrins/madritschas) accumpagnà els.