Surselva - «Telemarc è pli sportiv ch'ir cun skis»

Contemplar l'umbriva

El era scolast da skis ed alpinist, cura ch’el haja empruvà ils skis da telemarc, raquinta Martin Kreiliger. El saja adina stà fascinà dad ir pli lev cun skis en las muntognas.

Cun telemarc possian ins d’auzar il chaltgogn ed ins possia sa muventar pli libramain. Ins na saja serrà en uschè fitg cun ils pais. Mo l’emprim mument na saja quai betg simpel d’emprender dad ir cun telemarc. Ils skis eran graschels sco quels da passlung ed ils chalzers eran da tgirom. El aveva mo ina fotografia per guardar co quai funcziuna e cura ch’il sulegl gieva da rendì pudeva el contemplar sia sumbriva sin pista, di Martin Kreiliger.

Adina tschertgar l'equiliber

Telemarc plascha ad el, perquai ch’i saja pli sportiv ch'ir cun skis alpin. Ins dovria ils musculs e l’entir corp saja en tensiun; e perquai ch’ins stoppia adina tschertgar l’equiliber saja quai bler pli intensiv. Mo sco el declera saja quest sport pli saun; el enconuschia persunas che na possian betg ir cun skis, perquai ch’ellas hajan problems cun la schanuglia; mo cun telemarc possian ellas ir. Ed el haja problems cun ils dies, mo sch’el giaja telemarc na sentia el mai insatge. Cun ils skis alpin sentia el dentant las fridas.

Retro-piuniers

Tuttina fan mo intginas pacuas persunas quest sport, intgins individualists ubain sco Kreiliger di era: «retro-pioniers». Ins giaja encunter il svilup dad ir cun skis, vul dir: il chalzer vegnia fixà pli e pli fitg sin il ski e vid la ligiadira e quai saja auter tar il telemarc.

70 commmbers en Surselva

Il club da telemarc Surselva han trais persunas fundà 1992: Alex Krattiger da Flem (el è stà l’emprim president e presidiescha anc adina il club), Harald Maag e Jürg Marguth. Oz ha il club var 70 commembers.

Ord l'archiv: