Dapi l'onn 2004 vala la lescha davart l'egualitad da persunas cun impediments. Tranter auter pretenda questa lescha, che tut las staziuns dal traffic public ston vegnir adattadas als basegns da persunas cun impediments. Uschia ston era las 103 staziuns da la Viafier retica correspunder a questa lescha. Per far quai ha la Viafier retica temp enfin l'onn 2023. La staziun da Glion è la proxima staziun sin la glista. La citad da Glion cun l’ospital regiunal ed in lavuratori cun dimora da la ARGO, spetga gia daditg sin ina staziun adattada per persunas cun impediments.
Barrieras u sutpassadi
Per ch'ils passagiers possian ir senza privel sin ils perruns, ha la Viafier retica sin maisa duas variantas: passadis per peduns al nivel dals binaris u in sutpassadi cun rampas enfin sin ils perruns.
Ils passadis avessan barrieras che sa serrassan cura ch'in tren vegniss en staziun. Uschia na pudessan ils passagiers betg ir sur ils binaris gist en quest mument. Tge varianta che vegn bajegiada, n'è tenor Simon Rageth, pledader da la Viafier retica, betg anc decidì.
Sutpassadi favurisà da la vischnanca
La vischnanca da Glion favurisescha in sutpassadi. Quai ha confirmà il president communal Aurelio Casanova. La finamira è, da bajegiar il sutpassadi sut l’entira staziun e betg mo enfin ils perruns. Uschia duess il territori “Pendas”, che sa chatta tranter la staziun ed il Rain Anteriur, vegnir collià cun il center da la citad.
Il territori “Pendas” è quasi il sulet territori, nua ch’il center da Glion po anc crescher. Tenor Aurelio Casanova duessi dar ina zona maschadada, cun butias ed abitaziuns.
Entschatta da las lavurs 2016
Tenor Simon Rageth vul la Viafier retica instradar la procedura d'approvaziun dal project gia questa stad. Sche tut va sco planisà, pon las lavurs da renovaziun entschaiver la fin da l’onn 2016. La staziun renovada pudess lura vegnir averta vers la fin 2018. Il total da las investiziuns munta a radund 31 milliuns francs.