Per mussar in maletg realistic dal temp avant 135 onns, dovri ina massa statists. Radund 500 persunas, cunzunt umens che giogan el film per exempel miniers sin il plazzal dal Gottard. Chattar 500 statists n'è dentant betg simpel. Perquai datti spezialists che na fan nagut auter che tschertgar statists per reclamas, videos e films. Ina da quellas spezialistas è Jessica Hefti (25). Ella lavura dapi 4 onns sco assistenta da reschia, ed ha gia organisà plirs castings.
Motivaziun è il pli impurtant
Tenor Jessica Hefti è la motivaziun da daventar statist il pli impurtant. La persuna na sto betg correspunder exact al tip da persuna tschertgà, ed ella na sto era betg avair experientscha sco actur ni actura. Sminca e vestgadira istorica sajan era fitg impurtants per crear ina atmosfera realistica. Per ils radund 500 statists dal film sur dal Gottard tschertga ella umens robusts da tuttas vegliadetgnas. Persunas adattadas, ch'èn prontas da daventar statist, vegnan fotografadas e registradas en ina banca da datas.
Casting anc betg finì
Sper ir sin via a la tschertga da persunas adattadas per il film, ha Jessica Hefti era anc organisà differents castings per persunas interessadas. Ils proxims 2 castings han lieu mesemna ils 22 da fanadur a Cuera, e gievgia ils 23 da fanadur a Flem. Filmà vegn il film davent dal 1. da settember enfin ils 2 d’october a Valendau.