Da Mustér na po nagin vegnir a gidar. L’emprova d’ina patruglia da 20 voluntaris, dad ir cun ina maschina da pista da Mustér fin ad Acla, ha stuì vegnir interrutta a Curaglia, perquai ch’il privel da lavinas era memia grond. Il schef da salvament Pius Condrau dat la saira a las 17:30 las ordras als dad Acla, da terminar la tschertga dals sparids, perquai ch’i ha navì vinavant ed il privel da lavinas creschia.
Durant la notg vegn preparà a Mustér tut quai ch’i dovra per la tschertga dals sparids, uschia che quai po tut vegnir chargià en il helicopter uschè svelt che quel po sgular. Per ils sparids hai num spetgar vinavant.
Jau hai udì, co i han lavurà cun naiv e lura è puspè dà crappa dal chamin giu. Quai hai jau tut udì. Suenter èsi stà tut airi. E lura hai jau pensà: ussa èsi saira, ussa stuain nus star l’entira notg.
Quintà dad esser en il segir
Tut las persunas ch’eran sparidas eran en la chasa da Maurus Venzin, giudim il vitg en ina da las chasas ch’ins quintava ch’ellas sajan segiras da las lavinas. 3 persunas creschidas e 7 uffants. Tut il sbragir e clamar n’ha gidà nagut. Ins na po betg s’imaginar, co quai sto esser stà dad esser serrà en passa 20 uras en ina lavina e spetgar sin agid.
Nus discurrivan in pau in cun l’auter e schevan paternoss
Plimatschs dal canapé han gidà da dar in pau chaud als uffants che sa chattavan en stiva, cura che la lavina è vegnida. Els avevan gia sminà che Urs Flepp n’ha betg survivì la lavina, perquai ch’el na deva betg resposta.
La mamma Ursula Venzin era era persula en ses lieu. Ella mo udiva ils uffants. Ma lezs n’udivan betg ella.