Sut il titel «Oh Tavanasa – ina story denter sulegl ed umbriva» vegn organisà a Danis-Tavanasa ina exposiziun che consista ord 11 lieus en il vitg da Tavanasa che raquinta l’istorgia da Danis-Tavanasa. Latiers sa participeschan las ustarias dal vitg cun porscher la restauraziun e schizunt la veglia ustaria Sur Punt ch’è dapi decennis serrada vegn puspè averta per questas festivitads. Cumplettà vegnan tut quai cun in teater en il liber.
Las preparativas progredeschan bain ha il president dal comité d’organisaziun Rino Caduff ditg. Era cun la prevendita da bigliets sajan ins cuntents. La finamira saja da vender 2000 entradas, la mesadad hajan ins gia cuntanschì. Ina gronda part dals custs da 300’000 francs ston vegnir cuverts cun las entradas per bigliets.