L’entschatta da las lavurs da construcziun per la punt tranter Schluein e Castrisch è planisada per il mars 2016, sco il president da l’Uniun Ruinaulta, Christian Theus ha confirmà a RTR. Las protestas da las uniuns d’ambient hajan pudì vegnir regladas a moda e maniera constructiva. Els n’hajan betg stuì far grondas midadas vi dals plans primars. Planisà è ina punt da circa 2 m ladezza, pia ina punt sin la quala ins na po betg charrar cun autos. Ella è tenor Christian Theus ina impurtanta part da la rait da sendas da viandar en la Ruinaulta.
-
Bild 1 von 3Legenda: La punt actuala è in conduct per auas persas ed è serrada per peduns. Casutt Wyrsch Zwicky SA -
Bild 2 von 3Legenda: La punt ha ina lunghezza totala da 99 meters. Casutt Wyrsch Zwicky SA
-
Bild 3 von 3Legenda: La punt sa chatta sper l’Arena Crap Gries, la plazza da ballape da l’Uniun Sportiva Schluein Ilanz. Casutt Wyrsch Zwicky SA
2,1 milliuns francs
La punt vegn bajegiada da l’Uniun Ruinaulta ensemen cun il consorzi per las auas persas Foppa ed è en il medem mument punt e conduct per auas persas. Ella remplazza in vegl conduct dal consorzi, che manava aua persa sur il Rain vi. Enturn ils 7 da mars duain las lavurs da construcziun entschaiver. Tenor Christian Theus muntan ils custs totals a CHF 2,1 milliuns francs. Sche tut giaja tenor plan, duai la punt pudair vegnir surdada al public gia il november 2016, uschia Christian Theus.