Surselva - Reservuar d’aua nunconvenziunal

Il reservuar a Vitgeva sur Mumpé-Medel n’ademplescha betg pli las pretensiuns da segirtad ed igiena. Perquai ha la Corporaziun d’aua Mumpé-Medel decidì da remplazzar il reservuar dals onns 40 cun in nov. Empè da bajegiar in reservuar a moda convenziunala ord betun è dentant vegnì decidì da laschar construir in reservuar ord poliester rinforzà cun fibras da vaider. Il material ord ils quals ils tancs d’aua vegnan fabritgads è sumegliant al material per ils silos da fain e vegn era producì da las medemas firmas.

Plirs avantatgs

In reservuar d’aua ord poliester ha differents avantatgs. Entant ch’i dovra tschients tonnas material per fabritgar in reservuar ord betun, paisa il reservuar ord poliester che vegn prefabritgà mo 6 fin 7 tonnas, ha ditg l’inschigner Clemens Arpagaus. Quai spargnia blers transports oravant tut sch’il reservuars è en in lieu che n’è betg bain accessibel. Da l’autra vart è il poliester in material che na lascha betg fitgar bain glitta ed algas quai ch’è pli igienic.

Il reservuar a Mumpé-Medel vegn a custar var in mez milliuns francs. Sco Clemens Arpagaus di hajan stima el ch’ins haja pudì spargnar cun la soluziun dal reservuar ord poliester enturn 200’000 francs.