Cun las autoritads, ils chantuns, las vischnancas ed ils possessurs da terren nua che la Rallye Gotthard dueva ir atras eran ils organisaturs sa cunvegnids suenter intensivas contractivas.
L'Armada svizra ha fatg in stritg tras il quint
Nunspetgadamain ha l’Armada svizra dentant communitgà, ch’ella dovria sezza il plaz sin l’areal da la caserna ad Andermatt. Là avess stuì esser la basa per ils automobilists, lur teams e lur vehichels. In'alternativa, vul dir in plaz cun la dimensiun giavischada ch’è catramà n’han ils organisaturs betg chattà a curta vista ad Andermatt.
Uschia sto la 11. Rallye Gotthard vegnir annullada suenter avair impundì dus onns lavur da preparaziun. Quai ha Bernhard Brägger, il president dal comité d’organisaziun ditg a RTR.
Gia la segunda giada, che la rallye na po betg avair lieu
La cursa fiss stà ina cursa da rallye per il campiunadi svizzer cun participaziun internaziunala. Igl è gia la segunda giada che la Rally Gotthard ha stuì vegnir annullada.
Avant in onn era la rallye vegnida spustada perquai che las contractivas cun tut ils pertutgads ha duvrà dapli temp che quintà. Lura era vegnì organisà in prolog cun autos istorics .
Ulteriuras infurmaziuns
Sch’i vegn anc ina giada empruvà da laschar renascher la Rallye Gotthard n’è betg cler. Ina decisiun vegn a crudar fin la fin da l’onn. Nunpussaivla na saja l’organisaziun d’ina rallye en la regiun dal Gottard betg – sche las lubientschas e l’infrastructura ch’i dovra persuenter èn avant maun ad ura, scrivan ils organisaturs en lur communicaziun.
RR novitads 10:00