Co che quai po esser senza veterinari en la regiun ha in u l’auter pur da la Cadi gia sentì. Il veterinari e possessur da la pratica da veterinari a Sumvitg Urs Probst ha surdà dapi l’avust pli u main ina giada per mais il servetsch da pichet la fin d’emna. Quai haja procurà aifer ils purs per discussiuns, ha ditg Armin Berther ch’è en suprastanza da l’Uniun purila Mustér a Radiotelevisiun Svizra Rumantscha.
Sch’ins stoppia laschar vegnir per in cas urgent il veterinari da Glion en la Cadi, lura saja quai ina dumonda da custs ed i giaja era bler pli ditg fin ch’el saja al lieu. Damai che Urs Probst va plaunet en direcziun da la pensiun, sajan ils purs sa dumandads co ch'i giaja vinavant en il futur.
Tschertga successur
Il veterinari Urs Probst è era gia vegnì pledentà directamain dad in u l’auter pur che ha vulì savair co ch'i giaja vinavant. Urs Probst sez fatschenta questa dumonda betg pir ussa. El na tschertgia il mument betg fitg activ in successur, ma el tegnia averta ils egls e las ureglias.
Mia finamira è natiralmain bain, ch’jau avess sin il temp da mia pensiun ordinaria in successur, pertge jau vuless che la pratica giess vinavant.
Almain in provediment da basa duessi avair en la Cadi, manegia Urs Probst. Actualmain tschertgia el in terz veterinari. Dapi mez onn sajan els mo en dus. Chattar insatgi che vegn en la periferia ed en las muntognas a lavurar saja dentant grev. Latiers vegni il fatg che 90 pertschient dals absolvents dal studi da veterinari sajan dunnas. Per ina dunna saja quai fitg grev da metter sut in tetg la famiglia ed ina pratica or en la regiun.
Armin Berther è satisfatg che tant il veterinari sco era ils purs èn dal medem avis. La collavuraziun cun il veterinari saja buna e lur quitads na duai betg esser ina reproscha envers el. Activa na vegn l’Uniun purila Mustér il mument betg pertutgant il futur da la pratica da veterinari a Sumvitg.
RR Actualitad bunura 06:00