Ils 15 da zercladur vegn la 25avla festa da tir chantunala averta. Durant trais fins d'emna sajettan bunamain 8'000 tiraduras e tiradurs per premis en differentas categorias. Sajettà vegn en 14 differents stans da tir da l'entira Surselva.
La gronda novitad tar quella festa da tir è il sistem da registrar ils resultats da las tiraduras ed ils tiradurs. Quels resultats vegnan numnadamain tramess a moda electronica direct davent dals 14 stans da tir a Rueun, en il center da la festa.
Tenor il schef dal ressort manaschi da tir, Hubert Tomaschett, è il grond avantatg da quai sistem, che la rangaziun è enconuschenta sco ch'in tiradur ha finì sia seria. Direct suenter ch'el ha sajettà, sa el ir a Rueun en il center da festa per sias medaglias, cartas ni premis - tut tenor quant bain ch'el ha tutgà.
Ils finals live online
Ils finals pon schizunt vegnir persequitads online. Sin ina pagina d'internet speziala vegn inditgà il resultat da mintga sajet, e vitiers vegn anc mussà ina visualisaziun che mussa il lieu nua che mintga sajet ha tutgà la schiba.
RR actualitad 08:00