Surselva - Parlament da Glion refusa d'auzar la taglia d'immobiglias

La suprastanza da la vischnanca da Glion aveva proponì in auzament per 0,5 ‰ (promil) sin 1,5 ‰. Quella proposta ha pers encunter la proposta da Valentin Schmid, il parlamentari da Glion, che ha fatg la proposta d’auzar il pe da taglia be per 0,25 ‰. La finala è era la proposta da Schmid vegnida refusada. Quai è la terza giada ch'il parlament da Glion refusa d’auzar in pe da taglia. Las davosas duas giadas era quai stà il pe da taglia sin entradas ch'il parlament da Glion aveva refusà, e quai mintgamai cun l’incumbensa a la suprastanza da spargnar enstagl da vulair dapli entradas.

Era il plan d'investiziuns per ils onns 2020-2024 che prevesa investiziuns da 52 milliuns francs n'ha betg pudì midar l'opiniun dal parlament.

Spargnar è uss la devisa

Spargnar vul dir ch’i va vid il viv. Potenzial da spargnar vesa Carmelia Maissen, la presidenta da la vischnanca da Glion, surtut tar las purschidas dal temp liber e l’attractivitad dal lieu, sco domicil ni era sco center da cumprar en. Era ils secturs da cultura ni sport pon esser pertutgads. Ins possia er spargnar cun betg pli sustegnair occurrenzas sco «Städtlifest» e las differentas fieras. Era nagin tabu saja l'illuminaziun da Nadal. Spargnar possia la vischnanca dapertut nua ch'ella n'haja nagin duair tenor las leschas.

Las mesiras radicalas na sajan dentant betg attractivas e co la populaziun vegnia a reagir na sappia ella betg manegia Carmelia Maissen.

RR novitads 06:00