Ina colliaziun cun pendicularas tut normalas ed ina bella cuntrada, quai dettia en fitg bleras destinaziuns, ha il schef da las pendicularas Flem-Laax Reto Gurtner ditg vers il schurnal regiunal da radio SRF. Perquai stoppian ins porscher insatge spectacular.
Detagls n’èn anc betg enconuschents. Segir è che la vischnanca da Flem pretenda ina staziun a Foppa sur Flem. Davent da là duai la nova colliaziun manar directamain a Cassons. Reto Gurtner vul ch’ins haja sulet anc 15 minutas davent da Flem enfin a Cassons.
Pro Cassons cun speranza
Ch’igl dat nov schlantsch en chaussa Cassons plascha era a la Pro Cassons. Il president Arno Krucker spera, ch’igl giaja ussa vinavant, ch'i capitia finalmain insatge. Enfin ussa saja sulettamain vegni discurri, ma fatg na saja vegnì nagut. La finamira da la Pro Cassons saja, ch’il culm saja uschè spert sco pussaivel puspè collià.
Il schaner proxim vegn la vischnanca da Flem a dar ulteriuras infurmaziuns pertutgant il nov project.