Il bogn cuvert Gravas a Laax sto vegnir sanà e modernisà cumplettamain. Quella sanaziun custass a la vischnanca da Laax plirs milliuns francs; schliass dentant betg in segund problem dal bogn, numnadamain che quel scriva mintg'onn in deficit da 150'000 enfin 200'000 francs. Perquai ha la suprastanza communala tschertgà ina schliaziun co sanar il bogn ed el medem mument laschar a tschains quel per evitar il deficit annual.
Jugi cun center da wellness
La schliaziun pudess esser ina collavuraziun cun l'organisaziun Albierts da giuventetgna svizzers. L'idea da la suprastanza communala è da far ord il bogn cuvert in center da wellness che fiss collià cun ina jugi da 160 letgs, che duess vegnir bajegiada sur il bogn. L'organisaziun Albierts da giuventetgna svizra prendess a tschains quai entir cumplex e fiss responsabla per il manaschi da la jugi sco era dal bogn. Uschia vegniss il bogn sanà ed il deficit annual che la vischnanca ha stuì pajar enfin uss crudass. L’organisaziun Albierts da giuventetgna maina gia uschia in cumplex da jugi cun center da wellness a Saas-Fee en il Vallais.
Nova chasa da parcar
Collià cun quai project è era in project per ina chasa da parcar sutterrana cun total 130 plazs da parcar tranter il bogn cuvert ed il lai da Laax. L'organisaziun Albierts da giuventetgna quinta ch’ella dovria supplementar circa 30 plazs da parcar. Ils plaz existents en vischinanza dal bogn na tanschan tenor il president communal Franz Gschwend dentant gia uss betg pli. Perquai ha la suprastanza dumandà separadamain per in credit da planisaziun da 130'000 francs per quai parcadadi sutterran. Uschia possia quel vegnir planisà en detagl era sch'il project d'ina jugi cun center da wellness na vegniss la finala tuttina betg realisada.
Sche tut funcziuna senza retard, quinta Franz Gschwend il pli baud l’atun 2020 cun l'avertura da la nova jugi cun center da wellness. Ils custs totals da quai project ha il president communal buc vulì tradir. El stoppia spetgar enfin ch’ils projects da concurrenza sajan sin maisa. Avant na fetschia betg senn da communitgar ina cifra.