En l'intervista da la Rundschau di Remo Stoffel tranter auter, ch'el saja sez a la tschertga da las reservas zuppadas da l'hotel Therme a Val. Tenor il correspundent RTR Linus Livers fatschia Remo Stoffel mo beffas da ses adversaris cun dir, ch'el tschertgia sez las reservas zuppadas.
Burgais preoccupads da Val reageschan
![Il pledader dals Burgais preoccupads - Purtret da Peter Schmid](https://www.rtr.ch/static/cms/images/960w/f50fa6.jpg)
Curt suenter l'emissiun èn s'annunziads ils «Burgais preoccupads» – ina gruppa da vischins da Val che cumbattan la vendita da l'Hotel Therme a Remo Stoffel – en ina communicaziun a las medias. Els pretendan che giustia e politica vegnian activas. I sa tractia d’in delict uffizial che stoppia vegnir persequità.
Sche quai na vegnia betg fatg vulan els fundar in fond da solidaritad sin livel svizzer. Quel vulan els duvrar d'ina vart per rimnar daners e da l'autra vart sco basa per pudair purtar plant en chaussa.
Reservas zuppadas dapi almain l'onn 2000
Ils dus professers, ch'han evaluà l'expertisa sin dumonda da la Rundschau, vegnan a la conclusiun, chi sajan vegnidas fatgas reservas zuppadas almain dapi l'onn 2000. Quella giada giaiva fitg bain cun la terma. E da quel temp saja vegnì amortisà dapli che quai che fiss stà necessari.
Uschia sajan tant l'hotel Therme sco era la terma sezza vegnids schazegiads pli bass che lur valur reala. Experts discurran d'ina differenza da 10 enfin 15 milliuns francs. Tar la vendita na saja quai betg vegnì resguardà.
Facticamain èn ils experts da l'avis, ch'il pretsch da vendita è stà per 15 milliuns pli favuraivel che quai ch'el avess stuì esser.
Remo Stoffel na lascha betg valair ch'el haja pajà massa pauc
Il possessur da la Therme, Remo Stoffel, prenda posiziun sin questas reproschas en la Rundschau da SRF. El na lascha betg valair ch'el haja cumprà hotel e terma memia favuraivel. La populaziun da Val haja acceptà questa offerta.
Jau prend serius l'incumbensa dals da Val.
Che la populaziun da Val n'era betg infurmada da las reservas zuppadas, sco quai ch'ils professers attesteschan, metta Remo Stoffel sut las reglas normalas dal martgà economic liber. Già dapi onns haja Val tschertgà in investider e betg chattà el. Pir cun sia cumparsa saja l'hotel e la terma daventads interessant er per auters.
Contract secret
Ditg avant che la dumonda da cumpra da Remo Stoffel è vegnida enconuschenta aveva Stoffel fatg, sur sia firma, in contract secret cun ina part dal cussegl d'administraziun. L'intent dal contract, il «Memorandum of Understanding» era dad impedir, ch'auters interessents possian insumma far offertas.
En l'intervista cun la Rundschau na lascha Remo Stoffel er betg valair quai e punctuescha, ch'ils da Val hajan vendì l'hotel ad el e ch'el prendia serius quest'incumbensa.