Per la ZCapital Group, l’interpresa americana che ha surpiglià l’Hotel Waldhaus il december passà, èsi stà cler davent da l’entschatta ch’els veglian sa concentrar sin il manaschi dal hotel da luxus. Perquai è era vegnì decidì da vender la halla da curling construida l’onn 2009 che po era vegnir nizzegiada per events e congress.
Offerta fitg favuraivla
Ils 27 da november decidan ils convischins da la vischnanca da Flem, sch’els vulan cumprar la halla da curling. E quai per in pretsch fitg favuraivel. Cura che la halla è vegnida construida l’onn 2009 ha ella anc custà 12 milliuns francs. L’offerta che la vischnanca ha sin maisa è da pajar 3,95 milliuns francs. Anc adina ina gronda summa per la vischnanca da Flem. Tenor il president communal Adrian Steiger possia la vischnanca dentant finanziar questa investiziun.
-
Bild 1 von 3Legenda: La halla ha custà 12 milliuns francs e vegn ussa vendida per 4 milliuns. RTR, L. Livers -
Bild 2 von 3Legenda: Sper dar curling dat i era eveniments da tut gener en questa halla. RTR, L. Livers
-
Bild 3 von 3Legenda: La fatschada da la Waldhaus Arena e in mantè d’arom. RTR, L. Livers
Investiziun en l’avegnir – betg mo per il sport – era per il turissem
La cumpra da la halla da curling è per Adrian Steiger ina schanza che la vischnanca stoppia nizzegiar. I saja fitg impurtant da dar vinavant il curling a Flem. Tant per la vischnanca sco era per la destinaziun turistica. La cumprà n'è per el era betg mo ina investiziun per salvar la halla da curling. La halla è numnadamain bajegiada sin ina parcella da circa 6’500 m² en la zona da turissem. Terren che stess en l’avegnir a disposiziun per promover novs projects turistics.
RR actualitad mezdi 11:00