-
Bild 1 von 4Legenda: En ils territoris sut il vitg da Breil sa chattan radund 120 tschiervs durant l'enviern. RTR, Gionduri Maissen -
Bild 2 von 4Legenda: Arnold Caminada (sanester) e Gion Bundi miran cun interess vida tschella vart sin ils tschiervs. RTR, Gionduri Maissen
-
Bild 3 von 4Legenda: In bellezza di d'enviern. RTR, Gionduri Maissen
-
Bild 4 von 4Legenda: Arnold Caminada mira vida tschella vart sin las tscharvas. RTR, Gionduri Maissen
La selvaschina reducescha l’enviern sia temperatura dal corp, uschia ch’ella ha sulet anc tranter 17 e 20 grads temperatura, declera il guardiaselvaschina e manader dal district 2 da chatscha, Arnold Caminada. Uschia possia il tschierv surmuntar era in pli lung temp da navadas, senza perder grond energia. Surtut entras sportists da naiv u era entras persunas che vulan fotografar vegnia la selvaschina disturbada. Da quels disturbis hajan prendì tiers ils ultims onns.
Turissem e protecziun da selvaschina
Il turissem gioga in'impurtanta rolla en noss chantun. Ma il turissem e la selvaschina possian ir in sper l’auter ora. Surtut sche tut las persunas resguardian las zonas da ruaus. En Surselva hai il mument radund 50 talas zonas da ruaus, declera Arnold Caminada. Ina da las lavurs principalas il mument saja da far attent la populaziun, da laschar en ruaus la selvaschina cunzunt en questas zonas. Tar ina situaziun cun ina tala navada entaifer curt temp, saja quai er pussaivel d'instradar zonas da ruaus temporaras, accentuescha Arnold Caminada.
Betg pavlar ils animals
Cun pavlar la selvaschina vegnia quella concentrada en in pitschen territori ed uschia sajan donns vi dal guaud programmads. Plinavant saja vegnì observà ed era cumprovà che cun pavlar la selvaschina profiteschian surtut ils animals dominants. Ils animals flaivels na vegnian betg uschè tgunsch vitiers ina starliera, accentuescha il guardia selvaschina Gion Bundi. Era la biologia da l'animal selvadi saja concepida uschia ch’il magun vegnia pli pitschens durant l’enviern e cun porscher fain u auter pavel, na vegnia quest proceder biologic betg activà e la selvaschina pateschia, uschia Arnold Caminada.
Adina lavur per ils guardiaselvaschina
Durant l'entir onn vegni fatg la planisaziun e dumbraziun da chatscha. Uschia vegnia mintga animal observà ed era mintga animal ch’ins chattia futsch registrà e protocollà. Uschia possia il dumber dals animals vegnir stimà fitg bain, di Arnold Caminada. Plinavant saja impurtant che la populaziun annunzia a l'Uffizi chantunal da chatscha animals chattads u era observaziuns che han da far cun disturbis da la selvaschina. Senza las annunzias da la populaziun saja quai quasi nunpussaivel da far la lavur, quai surtut pervi ch’il territori saja grond.
RR actualitad 07:00