La giuvna Leonora Loher (17) e ses frar Livio (15) vivan el martgà Suzhou, datiers da Shanghai. Lur bab è creschì si a Trin Mulin, è dentant ì en China avant passa 10 onns per lavurar. A chasa discurran els tudestg svizzer e cunzunt englais. A Glion èn Leonora e Livio vegnids per emprender avunda sursilvan per savair discurrer cun lur famiglia, cunzunt cun il tat e la tatta.
Program variant
Sper emprender pleds e la grammatica, vesan ed audan Leonora e Livio er anc bler da la cultura rumantscha. Il program dal curs na preveda numnadamain betg mo scola. Il bloc d'instrucziun cuzza enfin las 14:30. Suenter chantan tuts participants ensemen chanzuns rumantschas. La saira suenter tschaina datti mintga di in program cultural cun prelecziuns litteraras, concerts, excursiuns e schizunt ina introducziun en il gieu da troccas.