Durant var 20 onns han pliras tschientmilli persunas visità il center d’infurmaziun che mussa co il tunnel da basa dal Gottard è vegnì construì.
Dapi ch’il plazzal da la Neat n’è dentant betg pli a Sedrun saja il center d’infurmaziun ì en emblidanza, declera il president communal da Tujetsch, Beat Roeschlin. Ins haja fatg ponderaziuns co pudair mantegnair vinavant l’exposiziun e carmalar natiers glieud, ma i na dettia naginas soluziuns.
Era l’idea da metter l’exposiziun en il tunnel en las galarias preparadas per la Porta Alpina na saja betg stà in’opziun declera Beat Roeschlin.
L’exposiziun è in emprest. Ussa vegn quella puspè enavos tar la fundaziun SBB Historic. Sco la responsabla per las collecziuns Susanne Hofacker ha confermà vegnian ils exponats da Sedrun ina giada magasinai e conservai. Co e nua ch'ils exponats vegnan puspè accessibels a la publicitad n'haja la fundaziun anc betg decidì.