Per il giubileum ha il dirigent Daniel Pally surdà ad Albert Spescha da cumponer ina cantata ord l’istorgia d’Ursin. Il cumponist ha elegì 10 da las 20 scenas da l’istorgia e cumponì la musica tar il text translatà en sursilvan da Gion Cadieli.
El haja sa laschà inspirar dals maletgs d’Alois Carigiet, ha ditg Albert Spescha. I sa tracta da cumposiziuns per chor maschadà e clavazin. Tenor Daniel Pally sajan las chanzuns adattadas al chor, uschia ch’i giaja bain da chantar ellas. Il chor chantia gugent las chanzuns popularas, manegia il dirigent vinavant.
Istorgia adattada per ina cantata
L’idea da laschar cumponer ina cantata ord l’istorgia d’Ursin per il concert da giubileum, ha gì Daniel Pally sez. El haja tschertgà ditg fin ch’el haja chattà in'istorgia rumantscha che saja adattada. Savens erian ils texts memia lungs.
Las scenas da l’istorgia che na vegnan betg chantadas, vegnan raquintadas da Giorgio Arpagaus. La chanzun finala vegn chantada ensemen cun ils uffants dal stgalim aut. Avant la cantata chantan ils uffants anc intginas chanzuns da tut different gener.