La Casa Depuoz festivescha quest onn il giubileum da 40 onns. En il decurs dals onns è il center per scolaziun ed integraziun da persunas cun impediments daventà in'instituziun d'impurtanza chantunala. Betg mo sco lieu d'integraziun, ma era sco grond emploiader per la regiun cun 135 collavuratur(a)s.
Per festivar il giubileum avra la Casa Depuoz sias portas ils 24 da settember, per dar als visitaders la pussaivladad d'emprender d'enconuscher il manaschi.
Co tut ha cumenzà
Nua duai la Casa Depuoz esser e cons scolars duai ella avair? Quai èn stadas duas dumondas che han fatschentà ils iniziants da quest project ils onns da 1950 e 1960. L’idea per bajegiar ina chasa e scola per uffants cun impediments aveva gì il canoni Christian Berther.
In lieu ch’el aveva prendì en mira era stà il chasti da Löwenberg sur Schluein, nua che las soras dominicanas devan scola. Mo l’uvestg ha la finala gì resalvas ed uschia ha Christian Berther tscharnì in’autra varianta cun l'hotel Disentiserhof a Mustér. L’uniun Casa Depuoz ha cumprà quel 1966, mo l’opposiziun (ins aveva tema ch’il turissem pateschia) è stada uschè gronda ch’ella ha puspè vendì l’hotel. A Trun ha l’uniun lura pudì bajegiar in nov edifizi ed avert il 1976 la Casa Depuoz.
-
Bild 1 von 4Legenda: Ina senda da sulada sin l'areal da la Casa Depuoz sto vegnir reparada. RTR, Linus Livers
-
Bild 2 von 4Legenda: Marcus Flepp dat instrucziuns a Rick e Maik (da san.). RTR, Linus Livers
-
Bild 3 von 4Legenda: Maik e Rick (da san.) vi da reparar la senda da sulada. RTR, Linus Livers
-
Bild 4 von 4Legenda: La lavur è fatga, la senda da sulada puspè planiva. RTR, Linus Livers
Nova purschida «tscherna da mastergn PLUS»
Giuvenils che vegnan en la classa «tscherna da mastergn PLUS» èn existenzas periclitadas. Per els è quella classa l'ultima schanza.
Sco quai che Matthias Gutmann, il manader da l’instituziun ha detg, quintan els cun in success da radund 50%. Success vul dir ch’ils giuvenils chattan la storscha e vegnan la finala da star en la vita sin agens pais. Tar la classa «tscherna da mastergn PLUS» sa tracti d’ina purschida ch’i dat pir dacurt en la Casa Depuoz. Ins na dastga betg scumbigliar questa purschida cun la classa normala da tscherna da mastergn, cun il «PLUS» èn vairamain manegiads ils cas ils pli extrems.
Emprender da vegnir sur sasez
Dapli dal tema
Tar la Casa Depuozs tutga dapi 2013 era la Casa Prisma che sa chatta amez il vitg da Trun. En questa chasa abitan giuvnas e giuvens ch’eran londervi da far l’emprendissadi.
Mo dasper l’emprendissadi han els era d’emprender da vegnir sur sasez. Perquai han els era da far il perchasa. Mintgina e mintgin ha da surpigliar pensums. In da quels è per exempel era far tschaina. Las giuvnas ed ils giuvens pon decider tge di ch’els vulan far quai e tge ch’els vulan cuschinar. Nus avain accumpagnà Ian.
Ord l'archiv
RR actualitad 06:00+