Sursaissa Mundaun ha dà il dretg da cumpra ad in nov resort. Plinavant dat ella ina contribuziun da promoziun à fond perdu da 3,8 milliuns francs il resort, sco la vischnanca ha communitgà en ina communicaziun a las medias.
Ils custs per il resort cun abitaziuns, chombras d'hotel ed ina clinica da reabilitaziun èn calculads cun radund 81 milliuns francs. I dat gia dapi 15 onns plans per il resort, scriva la vischnanca. Il stan actual dal project saja:
- I duai dar ina purschida da gastronomia, wellness, stanzas da seminar e differentas funcziuns
- per il resort vegnia davent d'immediat tschertgà investuras ed investurs
Damai che la zona da planisaziun per l'hotel valia anc enfin il 2028, stoppia ins nizzegiar il temp curt. En tut prevesia il plan da surbajegià u 104 abitaziuns da resort cun 422 letgs, u 156 chombras d'hotel cun 312 letgs, u abitaziuns da resort ch'èn er da nizzegiar sco chombras d'hotel (372 letgs).
Tar tut las variantas saja ina cumpart d'abitaziuns secundaras da 20% pussaivla. Suenter il Gea da la vischnanca duai la contribuziun e la concessiun d'in dretg da cumpra ad ina investura u in investur mussar il sustegn tras la vischnanca.
Ulteriuras decisiuns
Las votantas ed il votants han plinavant ditg GEA ad ina nova zona d'hotels en il territori da Obertor ed ina midada da la zona da skis en il territori da Surcuolm. En pli han ils da Sursaissa Mundaun approvà il quint annual da l'onn passà che serra cun in gudogn da passa 103'000 francs.
