Enstagl da decorar cun flurs vulan las dunnas da l’uniun «Vinavon» decorar ils proxims mais Sumvitg cun sutgas. Uschia vegnia quai a dar sutgas decoradas, coluradas ed ornadas, ma era sutgas per seser e discurrer, declera ina da las tschintg suprastantas Barbara Candinas. Naschida è l’idea cun vesair ina sumeglianta acziun en l’internet e lura han ellas cun discurrer e cun agid da bleras e blers realisà il project per questa stad. Planisà è d’exponer en plirs lieus a Sumvitg, dentant era a Sonn Benedetg, Clavadi, Cumpadials e Laus radund 70 sutgas, mintgina cun in pitschen motto e mintgina unica, di ina da las suprastantas Lisetta Cathomas.
«Steis Empau! Sutgas e bauns a Sumvitg»
Sco Barbara Candians raquinta deva quai in salid spezial a Luven. Cura ch’ins entupava ina u duas persunas sin in banc avant chasa lura salidavan ins cun «steis empau!». In salid ch'avriva savens in discurs e gist quai veglian ellas era cuntanscher cun lur acziun, da chattar temp da discurrer, da contemplar e da spassegiar da sutga tar sutga. Uschia èsi era planisà da far in pitschen plan per che tuts chattian alura era las sutgas exponidas, declera Cornelia Tuor da Cumpadials. Ed a Cumpadials han las dunnas da l’uniun avert las ultimas emnas la scola veglia, nua che tuts han pudì vegnir a zambregiar.
Nus avain mess a disposiziun guaffens, colurs e auter material e bleras dunnas ed umens han fatg diever a la purschida.
Ma fin uss na sa nagina da las dunnas tge che l’autra ha preparà per l’exposiziun. Tut è secret e fin la saira dals 24 da matg, cura ch'ellas installeschan tut na vegn quai era betg tradì, di Lisetta Cathomas.
Vernissascha ils 25 da matg a Son Benedetg
Il cumenzament uffizial da l’exposiziun è ils 25 da matg a Sogn Benedetg da las 09:30 uras. Alura vegn visità las sutgas ed ils bancs exponids a Son Benedetg, Plan da Crusch ed a Clavadi. Dasperas vegn anc tegnì pleds festivs cun intermezzos musicals, scriva l’uniun. Alura vegn quai ad esser pussaivel l’entira stad da contemplar e seser sin las sutgas exponidas. La finissascha è alura ils 17 d’avust a Laus e Cumpadials.