Dapi prest 20 onns, cun interrupziun dal temp da corona, cursescha la «Steila Surselva» las notgs da la fin d’emna durant l’enviern. Igl è ina purschida bainvesida surtut per ils giuvenils, per ir en sortida dad in vitg a l’auter en Surselva. La purschida è vegnida purtada fin uss da la Regiun Surselva e finanziada da quella cun sustegn da vischnancas, sponsurs e fauturs.
Venderdi passà ha la cussegliera guvernativa Carmelia Maissen dentant annunzià ch’i dettia sin la midada d’urari, ils 10 da december 2023, ina midada radicala. Da nov saja il chantun responsabel per quest servetsch. Ed il manaschi vegnia schizunt schlargià sin l’entir onn, e cun in'ulteriura lingia si Breil.
Il nov mainafatschenta da la Regiun Surselva, Roger Tuor, sa legra da la nova purschida:
La Steila è ina purschida geniala ed ina schanza per la regiun, per esser attractiva era anoragiu.
Per ils giuvenils sursilvans daventa numnadamain uschia la sortida «anoragiu», vers Cuira, anc pli attractiva. E quai exact en in mument, nua che la giuventetgna da la regiun è a la tschertga da bunas chaschuns per ir en sortida. Quellas mancan numnadamain en Surselva.
Enfin da qua devi in abunament da stagiun cun ina «carta da fautur» che custava 50 francs. Quella purschida n’exista betg pli. Enstagl san giuvenils cumprar in abunament general per la notg (Night-GA) per 99 francs. Quel vala per l’entira Svizra e per il bus en Surselva davent da las 19.00.
Lingia favurita: Glion – Cuera
Fin ussa eran ils bus da notg en funcziun tras la Surselva be durant la stagiun d’enviern. Da nov, cun la midada sin il nov urari, davent da mez december, avess quai dad esser il cas durant l’entir onn, simplamain be il venderdis e la sonda notg.
Tenor infurmaziuns da Roger Tuor, il mainagestiun da la Regiun Surselva, èn las frequenzas dils davos onns stadas pli u main stabilas. I dettia sa chapescha lingias pli popularas e main popularas. Da las circa 4500 frequenzas tranter december 2022 e mars 2023 sajan ver 2700 d’attribuir a la colliaziun Glion – Cuera.
Fin si Breil
Roger Tuor è fitg cuntent cun la nova soluziun: «Per nossa regiun è quai ina purschida enorm impurtanta ed attractiva. La purschida vegn schizunt anc augmentada cun in’ulteriura colliaziun si Breil. Uschia che fitg blers vitgs èn colliai cun il traffic public era durant la notg. Finamira resta ils proxims onns dad augmentar cun ulteriuras colliaziuns.»
La purschida dal bus da notg en Surselva – numnada «Steila Surselva» – va enavos sin ina petiziun da la Giuvna PCD Surselva. Sin basa da quella petiziun aveva la Regiun Surselva introducì l’enviern 2002/03 la «Steila Surselva». Ils emprims onns aveva ella pressapauc 10’000 frequenzas durant in enviern. Durant la pandemia da corona è il bus da notg dentant stà eri.