Cura che Philipp Camathias da Laax ha propi gudagnà in concert privat, è el stà fitg cuntent ma er in zic surstà. Per la saira gronda ha el envidà famiglia, amis e collavuraturas da la Spitex, che sustegnan el en ses mintgadi. Uschia è ina gruppa dad 11 persunas sa messa patgific sin il sofa ed ha spetgà plain tensiun sin il concert. La gruppa era bun surstada cura ch'il caberettist enconuschent Flurin Caviezel è entrà cun ses orgelet da maun. El è vegnì accumpagnà da Joan Retzke, che suna trumbetta.
Cun buna luna e sgnoccas ha il duo procurà per risadas tar il publicum. Per bundant ina mes'ura han ils musicants sunà tocs da musica classica, schlaghers e musica populara per lur audituras ed auditurs. Per quels èsi stà fitg spezial dad udir in concert uschè datiers als musicists professiunals en in conturn famigliar. Ma era per ils musicists sezs èn ils concerts en stivas privatas fetg prezius.
Igl è bler pli emoziunal che sin ina tribuna gronda.
Per finir la saira hai dà in apero suenter il concert. Philipp Camathias è stà fitg cuntent cun il concert e la bella atmosfera cun ses giasts. Ed uschia ha il concert privat legrà ils auditurs sco er ils musicists che han sunà per questa giada sin ina tribuna pli pitschna che usità.
Il concert m'ha plaschì grondius.
