Sonda passada ha ina skiunza observà dus lufs sin ina pista en il territori da skis a Sursaissa Mundaun. Ils dus animals da rapina sajan suandads in curt temp ina segunda skiunza, avant ch'els hajan puspè bandunà la pista, scriva l’Uffizi da chatscha e pestga.
Ord vista da la skiunza davostiers veseva quai ora sco ina persecuziun. Igl è dentant er stà uschia ch'ils lufs han lura spert bandunà la pista e tschertgà protecziun en il guaud.
Nagin cumportament extraordinari
Il triep da tschintg lufs, che viva en quest territori, saja probabel vegnì disturbà en ses lieu nua ch'el passentia il di. Cun fugir en guauds pli bass hajan ils animals traversà la pista da skis. En quest connex n'hajan ils lufs betg mussà in cumportament extraordinari, declera Hannes Jenny da l'Uffizi da chatscha. Persunas en il territori da skis na sajan mai stadas en privel.
Communitgar avertamain
Ils lufs na sajan mai sa drizzads vers la glieud sin pista, declera Hannes Jenny. L'uffizi chantunal veglia tuttina communitgar avertamain. Pertge:
Quest schabetg ha segir potenzial da vegnir discutà fermamain en la publicitad.
Plinavant veglia l'uffizi far enconuschent a la populaziun che tals cas vegnian intercurids da la surveglianza da chatscha. Impurtant saja uschia d'annunziar talas entupadas.