Il mainascola da la scola da la vischnanca dad Ilanz/Glion, Silvio Dietrich, ha abditgà sin la fin da l'onn da scola 2023/24, sco quai ch'el ha confermà sin dumonda da la FMR. Dapi 30 onns è il scolast gia engaschà en la scola da Glion, durant blers onns a favur da la scola da la citad da Glion e pli tard per la scola da la vischnanca fusiunada. Silvio Dietrich di che ses figl entria l'onn proxim en scolina e quai saja era in dals motivs da terminar ses engaschi al timun da la scola.
Ils davos onns sco mainascola sun jau plitost ma fatschentà cun la dumonda co ils scolars vegnan en scola enstagl cun il manaschi da scola.
Il transport da scolars tranter las fracziun è per la scola dad Ilanz/Glion ina pulita sfida.
Sco quai che Silvio Dietrich di, vul el en ina u l'autra furma star fidaivel a las scolas. Ina part da ses engaschi vegn el vinavant ad impunder a sia interpresa privata, el saja dentant anc a la tschertga dad in ulteriur engaschi. Ch'i n'è betg simpel da chattar ina successura u in successur al timun da la scola da Glion è era Silvio Dietrich conscient. El saja interessà ch'i dettia ina buna cuntinuaziun. Ed el vesia era aspects positivs per il manaschi, sch'i dat ina midada al timun.