Sonda è la musica populara stada en il center a Sedrun. Var 700 persunas èn sa participadas al 49avel di grischun dals jodladers. Igl è ina sentupada che l’Uniun grischuna da jodlar organisescha mintg’onn en in auter lieu.
Il jodel è derasà plitost en il Grischun tudestg, Grischun central ed Engiadina. En Surselva datti dus chors da jodladers, il Jodelchörli Sardona da Flem ed il Jodelchor Zervreila da Val S. Pieder. Chors, gruppas da sunatibas e bittabandieras han tgirà cumpagnia, musica e folclora. Ils chors ed ils sunatibas èn sa preschentads en la baselgia parochiala da s. Vigeli.
-
Bild 1 von 5Legenda: Jodelchor Zervreila da Val S. Pieder Jodelchor Zervreila da Val S. Pieder RTR -
Bild 2 von 5Legenda: Jodelchörli Sardona da Flem Jodelchörli Sardona da Flem RTR
-
Bild 3 von 5Legenda: Sunnatibas Muntanialas Glion Sunnatibas Muntanialas Glion RTR
-
Bild 4 von 5Legenda: ils participants e las participantas durant il gentar RTR
-
Bild 5 von 5Legenda: 30 sunatibas han dà l'entschatta da la festa FMR
Nagins giudicaments
En il center da la sentupada annuala dals chors da jodladers dal Grischun èn las producziuns en la zona da silenzi stadas. En tut èn 34 furmaziuns, chors, duets, terzets, in solist e gruppas da sunatibas, sa preschentads en la baselgia parochiala da s. Vigeli. Quai ch’è dà en egl è quant bain che tut las furmaziuns articuleschan, i para che jodladers e jodladras dattan pais a finiziuns e consonants finals.
Olivia Christen, collavuratura da RTR ed oriunda da Tujetsch, ha moderà la part en la zona da silenzi. Per questa part datti dentant nagins giudicaments d’experts. Cun ina disciplina admirabla ha l’auditori giudì las producziuns, ils chors han persvas cun punctualitad ed expressiun. Mintgamai durant set minutas, han tut las furmaziuns preschentà lur chanzun u melodia.