Omicron fatschenta il mument tuts. Las infecziuns cun quest virus s'augmentan ed èn sin in stan fitg aut. Era las scolas grischunas èn pertutgadas. Sco l'inspectur da scola Philipp Hugentobler da l'Uffizi per la scola populara ed il sport ha confermà envers RTR – na datti betg mo scolars e scolaras, mabain era magistraglia ch'è pertutgada dal virus e che sto ir en isolaziun. Las scolas vegnan dentant d'organisar l’instrucziun en scola
Bleras scolas vegnan da s’organisar intern. Magari vegn mess ensemen duas classas ni ch’ina pedagoga curativa surpiglia ina classa. Er avain nus l’offerta da la Scola auta da pedagogia che students e studentas pon surpigliar per in temp ina classa.
Grondas sfidas
Glion ha ina da las grondas scolas en il chantun Grischun. 500 uffants visitan en sis lieus da scola la scola populara. Per il manader da scola Silvio Dietrich fissi tuttina, sche las restricziuns e regulaziuns pervia da corona vegnissan plaunsieu abolidas.
Mes giavisch fiss da chalar cun la mesiras da corona, puspè viver en la normalitad ed acceptar corona sco ina normala grippa che nus stuain mirar da far star a chasa quels che han sintoms. Laschar reger il saun giudizi.